2025 yil 14 avgust kuni Xalq deputatlari Kattaqo‘rg‘on tumani Kengashining yettinchi chaqiriq o‘n uchinchi sessiyasi bo‘lib o‘tdi. Sessiyaga tuman hokimi, Kengash raisi Jamshid Nasriddinov rahbarlik qildi.

Sessiya kun tartibida tumanning iqtisodiy, ijtimoiy va infratuzilma sohalaridagi muhim masalalar atroflicha muhokama qilindi.

Deputatlar sessiyada quyidagi yo‘nalishlarda qarorlar qabul qilishdi:

2025 yil 28 martdagi VII-8-45-7-96-K/25-sonli qarorga o‘zgartirish kiritish;

mahalliy byudjetning qo‘shimcha manbalaridan maqsadli foydalanish;

“Fuqarolar tashabbusi” va “Infratuzilma va ijtimoiy barqarorlik” jamg‘armalari hisobidan mablag‘ ajratish;

“Zarbdor tajribasi” asosida sanoat, xizmat ko‘rsatish va qishloq xo‘jaligida 2-bosqich drayver loyihalarni ma’qullash.

Tuman hokimi Jamshid Nasriddinov sessiyada tumanni ijtimoiy-iqtisodiy rivojlantirish bo‘yicha amalga oshirilgan ishlar va kelgusi rejalar haqida hisobot berdi.

Shuningdek, 2025 yil 29 apreldagi qaror ijrosi yuzasidan tuman maktabgacha va maktab ta’limi bo‘limi boshlig‘i Shokir Sultonovning hisoboti tinglandi. U Ilk rivojlanish markaziga bolalarni jalb qilishda bepul qilish taklifini berdi va deputatlar bu taklifni bir ovozdan qo‘llab-quvvatlashdi.

Yoshlar siyosati yo‘nalishida esa O‘zbekiston Yoshlar ishlari agentligi tuman bo‘limi boshlig‘i L. Abduqaxxorovning birinchi yarim yillik faoliyati haqida hisoboti tinglandi. Kamchiliklar va yechimlar yuzasidan deputatlar tomonidan keskin tanqidiy fikrlar bildirildi va hisobotni takomillashtirgan holda keyingi sessiyada yana eshitishga qaror qilindi.

A. Navoiy mahallasi raisi va “Mahalla yettiligi”ning hisoboti ham deputatlar e’tiborida bo‘ldi. Ularda tadbirkorlikni rivojlantirish, aholi bandligini ta’minlash, infratuzilma va ijtimoiy sohada amalga oshirilgan ishlar misollar bilan yoritildi.

Sessiyada deputatlar hisobotlar va takliflar mohiyatiga chuqur kirib, aholining manfaatiga xizmat qilmaydigan yoki yetarli darajada ishlanmagan masalalar bo‘yicha e’tirozlarini bildirishdi.

Yig‘ilish yakunida muhokama qilingan barcha masalalar bo‘yicha tegishli qarorlar qabul qilindi va ularning ijrosini ta’minlash bo‘yicha mas’ullarga aniq vazifalar yuklatildi.