O‘zbekiston Respublikasi Samarqand viloyatining Kattaqo‘rg‘on tumani va XXR Henan provinsiyasining Jenjou shahri o‘rtasida do‘stlik aloqalari mustahkamlanmoqda.

Jenjou shahar ma’muriyati binosida Kattaqo‘rg‘on tuman delegatsiyasi uchun navbatdagi uchrashuv tashkil etildi. Uchrashuvda Kattaqo‘rg‘on tuman hokimi J.Nasriddinov Jenjou shahar hokimining o‘rinbosari Ma Chjifen bilan ikki tomonlama do‘stlik aloqalarini yanada mustahkamlash yuzasidan muhokamalar o‘tkazdi. Shuningdek, Jenjou shahar hokimligi va "SUS GROUP" kompaniyasi tashabbusi bilan Jenjou rivojlanish zonasida tashkil etilgan "Zhengzhou-Kattakurgan investment and trade fair" forumida tumanning investision va eksport salohiyati namoyish qilindi.

Forumda O‘zbekistonda yangi loyihalarni amalga oshirish istagida bo‘lgan 100 dan ortiq Xitoy kompaniyalari vakillari ishtirok etdi. Natijada, 16 ta korxona bilan tumanda istiqbolli loyihalarni amalga oshirish bo‘yicha dastlabki anglashuv bitimlari imzolandi.

Shuningdek, hozirgi vaqtda Kattaqo‘rg‘on tuman Investisiyalar, sanoat va savdo bo‘limida faoliyat yuritgan Gʻ.Majidov Xitoyning tajribasini o‘rganish maqsadida Henan universitetida tahsil olmoqda.