Kattaqo‘rg‘on tumanida oilaviy qadriyatlarni mustahkamlash, ajrimlar sonini kamaytirish va yoshlar ongida oilaning muqaddasligiga oid qarashlarni shakllantirish borasida tizimli ishlar olib borilmoqda.

2022 yil 4 yanvardan boshlab, har chorshanba kuni “Oilaviy qadriyatlarni mustahkamlash” komissiyasi va “Oqila ayollar harakati” a’zolari ishtirokida tumandagi notinch oilalar, ajrim yoqasiga kelib qolgan er-xotinlar hamda ijtimoiy himoyaga muhtoj oilalar bilan doimiy muloqotlar o‘tkazib kelinmoqda. Ularda huquqiy va diniy maslahatlar beriladi, yarashtirish ishlari amalga oshiriladi.

Shu maqsadda, 2024 yil 12 mart kuni Xalq deputatlari Kattaqo‘rg‘on tumani Kengashining qarori bilan tuman komissiyasi tarkibi rasman tasdiqlangan. Natijada, 2024 yil davomida 386 ta oilada ajrimning oldi olindi. 2025 yilning yanvar oyida esa komissiya tomonidan yana 23 ta oila saqlab qolindi. Solishtirish uchun aytish joizki, 2023 yilda 292 ta, 2024 yilda esa 286 ta oila ajrimdan qutqarilgan. Bu esa ajrimlar soni 6 taga kamayganini anglatadi.

Kattaqo‘rg‘on tumanida ajrimlar ko‘p qayd etilgan mahallalarda ham maxsus uchrashuvlar tashkil etilmoqda. Ularda tuman Oila va xotin-qizlar bo‘limi boshlig‘i Sayyora Jumayeva ma’ruza qilib, oilaviy nizolarning sabablari va ularni bartaraf etish yo‘llariga to‘xtaldi:

🔹 Moddiy yetishmovchilik,
🔹 uchinchi shaxs aralashuvi,
🔹 befarzandlik,
🔹 juftlar o‘rtasidagi xiyonat,
🔹 uzoq vaqt birga yashamaslik,
🔹 tushunmovchilik,
🔹 qaynona-kelin munosabatlaridagi muammolar,
🔹 ichkilikka berilish,
🔹 ortiqcha qarz va kreditlar olish,
🔹 xorijga ishga chiqish oqibatidagi uzoq ayrilliklar — asosiy sabablar sifatida ko‘rsatildi.

Sayyora Jumayeva ta’kidlaganidek: “Har bir oilaviy ajrim — jamiyat uchun katta fojia. Achinarlisi, ikki-uch bolali ota-onalarning ‘xarakterimiz to‘g‘ri kelmadi’ degan bahonalar bilan farzandlari taqdirini o‘ylamasdan yo‘llarini ayrishi qalblarni larzaga soladi. Shu bois, har bir oilani saqlab qolish, ularni yarashtirish borasida barchamiz mas’ulmiz.”

Uning fikricha, yoshlarni turmushga tayyorlash, oila ilmidan xabardor qilish, oilaning muqaddas qo‘rg‘on ekanligi haqida keng targ‘ibot ishlarini olib borish dolzarb ahamiyatga ega. Bu yo‘lda mahalla faollari, nuroniylar, ma’naviyat va ma’rifat tashkilotlari hamkorlikda harakat qilishi zarur.
“Yoshlarimizga pand-nasihatlar berish, ibratli voqealarni misol keltirish, notinchliklarning og‘ir oqibatlarini ularga yetkazish — har birimizning burchimiz. Chunki oila barqarorligi — jamiyat barqarorligi demakdir.”