Samarqand viloyati Kattaqo‘rg‘on tumani, Mullako‘rpa mahallasida joylashgan “Qo‘shxovuz” MCHJ ga tegishli zamonaviy issiqxonada Turonbank hamda Limonchilik uyushmasi hamkorligida “Milliy mahsulot – milliy faxr: Limonchilar bilan uchrashuv” mavzusida tadbir bo‘lib o‘tdi.

Tadbirda tuman hokimi Jamshid To‘lqinovich Nasriddinov, Turonbank Boshqaruv Raisi o‘rinbosari Dilshod Abduxapisovich Rustamov, limonchilik bo‘yicha katta tajribaga ega mutaxassis Nusrat Saidov, “Denov Agrostar” MCHJ direktori O‘ktam Mahmudov hamda O‘zbekiston Respublikasi Qishloq xo‘jaligi vazirligi vakili Anvar Djumanov, respublikadagi limonchilar, tadbirkorlar ishtirok etdi.

Uchrashuv avvalida hokim Jamshid Nasriddinov tadbir ahamiyati haqida so‘z yuritib, limonchilik sohasini rivojlantirishda banklar, tadbirkorlar va olimlarning o‘zaro hamkorligi muhim ekanini ta’kidladi.

Shundan so‘ng Turonbank Boshqaruv Raisi o‘rinbosari Dilshod Rustamov bank tomonidan qishloq xo‘jaligi sohasiga, xususan, limonchilikka ko‘rsatilayotgan moliyaviy ko‘mak va loyihalar haqida ma’lumot berdi.

Limonchilik bo‘yicha katta tajribaga ega Nusrat Saidov o‘z ma’ruzasida limon yetishtirishda qo‘llaniladigan zamonaviy usullar, mehnat va sabrning ahamiyati haqida fikr almashdi. 

O‘zbekiston Respublikasi Qishloq xo‘jaligi vazirligi boshqarma boshlig‘i Anvar Djumanov esa organik ishlab chiqarish va sertifikatlashtirish jarayonlari bo‘yicha kerakli tushuntirishlar berdi.

Shuningdek, “Denov Agrostar” MCHJ direktori O‘ktam Mahmudov amalga oshirilayotgan yirik loyihalar bilan ishtirokchilarni tanishtirdi.

Tadbir doirasida limonchilik sohasidagi ilg‘or tajribalar taqdimoti, turli limon navlari va mahalliy mahsulotlar ko‘rgazmasi hamda seminar va savol-javoblar bo‘lib o‘tdi.

Uchrashuv ishtirokchilariga limonchilikni yanada samarali tashkil etish, yangi bozorlarga chiqish hamda milliy mahsulot sifati orqali O‘zbekiston qishloq xo‘jaligi qudratini namoyish etish yo‘nalishlarida muhim tavsiyalar berildi.