“Ustoz – millat tayanchi, kelajak qurilishining asosiy me’mori. Mahoratli o‘qituvchi qo‘lida esa Vatan taqdiri, xalq ravnaqi va avlod kamoli mujassam.”

🇺🇿 Kattaqo‘rg‘on tumanida ana shunday ulkan ma’naviy g‘oyani o‘zida mujassam etgan "Mahoratli o‘qituvchi - millat tayanchi" shiori ostida to‘rtinchi “Ustozlar milliy forumi” o‘tkazildi.

👨‍💼 Forumda tuman hokimi Jamshid Nasriddinov, maktab va maktabgacha ta’lim muassasalari direktorlari, yuksak obro‘-e’tiborga sazovor faxriy ustozlar hamda soha fidoyilari ishtirok etdilar.

Tadbir avvalida hokim qo‘l mehnatlari, rassomchilik va haykaltaroshlik namunalari, bolajonlar ijrosidagi musiqiy chiqishlar bilan tanishdi. Bu ko‘rgazmalarda yosh avloddagi iqtidor va ustozlar mehnatining samarasi o‘z ifodasini topdi.

Shundan so‘ng tuman hokimi Jamshid Nasriddinov so‘zga chiqib, ta’lim sohasida erishilayotgan yutuqlar, mavjud muammolar va kelgusi vazifalar haqida to‘xtalib o‘tdi. U o‘z nutqida:
“Najot - ta’limda, najot - tarbiyada, najot -najot - bilimda. Har bir taraqqiyot poydevori – ilm. Ilmni esa inson qalbiga sidqidildan xizmat qiladigan ustozlar singdiradi. Shu bois ustozlarga yaratilgan imkoniyat – bu kelajakka qo‘yilgan mustahkam asosdir,” – deya ta’kidladi.

Forum ishtirokchilari ham pedagoglar va ota-onalarga yo‘llangan samimiy murojaatlarida ustozlikning muqaddas va sharafli burchi haqida fikr bildirishdi.

Tadbirning eng ruhlantiruvchi qismi – bu oliy ta’limni yakunlab ishga kirishgan yosh o‘qituvchilarning qasamyod marosimi bo‘ldi. Ular Vatan va millat oldidagi mas’uliyatli vazifani sidqidildan ado etishga qasd ichdilar.

Forum yakunida esa bir qator faol pedagoglar minnatdorchilik ifodasi sifatida tashakkurnomalar va esdalik sovg‘alari bilan taqdirlandi.

✨ Kattaqo‘rg‘on tumanida o‘tkazilgan mazkur forum ustozlarning nufuzini yanada yuksaltirdi, yosh avlod tarbiyasida ularning beqiyos o‘rni va millat taqdiriga daxldorlik mas’uliyatini yana bir bor namoyon etdi.