Bugun, 2025 yil 20 avgust kuni Bishkek shahrida «Ayol – lider, dunyoni yaxshilik sari o‘zgartiruvchi kuch» shiori ostida yirik xalqaro forum bo‘lib o‘tdi. 

Unda Qirg‘iziston va O‘zbekistondan siyosat, ilm-fan, madaniyat, sport, tadbirkorlik hamda jamoatchilik sohasida faoliyat yuritayotgan 200 ga yaqin ayol-rahbarlar ishtirok etdi.

Forumda Qirg‘izistonning Birinchi xonimi Aygul Japarova 
va O‘zbekiston Respublikasi Prezidenti Administratsiyasi rahbari Saida Mirziyoyeva ham faol ishtirok etdi.
Ochilishda so‘zga chiqqanlar ayollarning jamiyat taraqqiyotidagi beqiyos o‘rniga alohida to‘xtaldi.
Ushbu nufuzli anjumanda Kattaqo‘rg‘on tumani tadbirkori Gulmira Jumayeva ham qatnashdi. U o‘z chiqishida o‘zining hayotiy yo‘li va tadbirkorlik faoliyati haqida so‘zlab berdi.

Gulmira Jumayeva 2008 yillarda mehnat izlab xorijga chiqqan paytlaridan to bugungi kunda Samarqand viloyatida maishiy chiqindilarni qayta ishlash zavodi tashkil etgungacha bo‘lgan sinovli yo‘lini samimiylik bilan bayon qildi. Uning ta’kidlashicha, hozirgi kunda mazkur korxonada yuzdan ortiq ayollar ish bilan ta’minlangan.

— «Mening maqsadim – nafaqat tadbirkorlik orqali daromad topish, balki ayollar uchun ish o‘rinlari yaratish, jamiyatda ularning nufuzini oshirishdir. Ayolning kuch-qudrati va matonati bilan har qanday qiyinchilikni yengish mumkin», — dedi Gulmira Jumayeva o‘z nutqida.

Forum doirasida Gulmira Jumayeva va boshqa ishtirokchilar o‘z tajribalari bilan o‘rtoqlashib, ikki qardosh xalq ayollari o‘rtasidagi do‘stlik va hamkorlikni mustahkamlash yo‘lida fikr almashdilar.