Yurtimizda xotin-qizlarning ijtimoiy hayotdagi faolligini oshirish, ularni ish bilan ta’minlash va turli sohalarga jalb etishga qaratilgan keng ko‘lamli ishlar olib borilmoqda. Bu borada Kattaqo‘rg‘on tumanida ham bir qator manzilli ishlar yo‘lga qo‘yilgan.

Shu maqsadda, viloyat hokimining o‘rinbosari — oila va xotin-qizlar boshqarmasi boshlig‘i Zebo Saidova Kattaqo‘rg‘on tumanida bo‘ldi.

Dastlab, u Kadan mahallasida joylashgan 2-sektor binosida tuman hokimi Jamshid Nasriddinov bilan birgalikda xotin-qizlarning murojaat va takliflarini tingladi. Muloqot jarayonida ayollarni qiynayotgan muammolar, ish bilan ta’minlash, tadbirkorlikni rivojlantirish, oilaviy masalalar yuzasidan fikrlar bildirildi.

Shu kuni xotin-qizlar uchun “Bo‘sh ish o‘rinlari” yarmarkasi ham tashkil etildi. Yarmarkada ish izlovchi ayollar turli korxona va tashkilotlar bilan to‘g‘ridan-to‘g‘ri muloqot qilib, ishga joylashish imkoniyatiga ega bo‘lishdi.

Shuningdek, madaniy dastur ham tashkil etilib, san’atkorlar chiqishlari orqali yig‘ilganlarga ko‘tarinki kayfiyat ulashishdi. Bir guruh bolajonlarga maktab so‘mkalari tarqatildi.