2025 yil birinchi yarim yillik natijalari tahlili

Kattaqo‘rg‘on tumanida 2025 yilning birinchi yarim yilligida iqtisodiyot, ijtimoiy hayot va infratuzilmani rivojlantirish yo‘nalishida salmoqli yutuqlar qo‘lga kiritildi. Prezident qarorlari ijrosini ta’minlash, aholini kambag‘allikdan chiqarish va yangi ish o‘rinlari yaratish borasida amalga oshirilgan ishlar tuman taraqqiyotining yangi bosqichiga yo‘l ochmoqda.

Kambag‘allikka qarshi kurash va bandlik

Yil davomida 2703 nafar aholi (12 385 ta oila)ni kambag‘allikdan chiqarish bo‘yicha maqsadli ko‘rsatkichlar belgilangan bo‘lib, yarim yillikda rejadan ancha yuqori natijalarga erishildi. Reja bo‘yicha 1407 ta oila qamrab olinishi ko‘zda tutilgan bo‘lsa, amalda 2657 ta oila (11 885 nafar a’zo) kambag‘allikdan chiqarildi. Bu — 185 foizlik ijro degani.

Shuningdek, yarim yillikda 9710 nafar aholini ishga joylashtirish rejalashtirilgan bo‘lib, amalda 12 108 nafar fuqaro bandligi ta’minlandi. Natijada reja 125 foizga bajarildi.

Investisiya va sanoat

2025 yilda hududiy investisiya dasturi doirasida qiymati 87 mln. dollar bo‘lgan 61 ta loyihani amalga oshirish ko‘zda tutilgan. Buning hisobiga 847 ta yangi ish o‘rni yaratiladi. Shuningdek, xorijiy investisiyalar o‘zlashtirish bo‘yicha yillik ko‘rsatkich 65 mln. dollar etib belgilangan.

Eksport yo‘nalishida ham ijobiy natijalar qayd etildi. Yil uchun 14,4 mln. dollarlik mahsulot eksport qilish rejasi belgilangan bo‘lib, bu o‘tgan yilga nisbatan 124 foiz ko‘pdir.

Qishloq xo‘jaligi va oziq-ovqat xavfsizligi

Kattaqo‘rg‘on fermerlari 8926 gektar yerda 55,7 ming tonna g‘alla yetishtirib, davlat rejasini 106,3 foizga bajardi. Pillachilik sohasida ham yuksak natija qayd etildi: 7233 qutidan 435,4 tonna pilla hosili olindi.

Dehqon xo‘jaliklari uchun ijara yerlari ajratilib, 1931 gektarda kooperativ usulida ishlarni tashkil etish maqsadida 15 ta yirik tadbirkor biriktirildi.

Infratuzilma va obodonchilik

2025 yilning olti oyi davomida 129 km yo‘l ta’mirlandi, shundan 53,6 km asfalt, 75,4 km shag‘al yo‘l. Shuningdek, 13,8 km piyodalar yo‘lagi barpo etildi.

Ichimlik suvi ta’minoti yaxshilanib, 12 km yangi tarmoqlar tortilib, aholi qamrovi 61,8 foizdan 64,1 foizga yetdi. Gaz ta’minotida ham yangilanishlar amalga oshirilib, 470 ta xonadon zamonaviy elektron hisoblagichlar bilan ta’minlandi.

Energiya tejash sohasida 146 ta ob’yektga 2472 kVt quyosh panellari o‘rnatildi.

Ta’lim va sog‘liqni saqlash

Tuman tibbiyot birlashmasi 301 ming aholiga xizmat ko‘rsatmoqda. Markaziy shifoxonada zamonaviy sharoitlar yaratilgan, turli yo‘nalishdagi bo‘limlar faoliyat yuritmoqda.

Ta’lim sohasida ham islohotlar amalga oshirilib, maktablarda ta’mirlash va jihozlash ishlari olib borilmoqda. Yangi o‘quv yiliga tayyorgarlik jarayonlari sektorma-sektor tashkil etilgan seminarlarda muhokama qilindi.

Xulosa

Kattaqo‘rg‘onda amalga oshirilayotgan islohotlar natijasida aholining turmush darajasi oshmoqda, infratuzilma yangilanmoqda, sanoat va qishloq xo‘jaligi yangi bosqichga ko‘tarilmoqda. Birinchi yarim yillikda qo‘lga kiritilgan natijalar tumanning keyingi rivojlanish istiqbollari uchun mustahkam asos bo‘lib xizmat qiladi.