Kattaqo‘rg‘on tumani hokimi o‘rinbosari Bahodir Sulaymonov boshchiligida fermer xo‘jaliklari va agrosanoat sohasi vakillaridan iborat delegatsiya Xitoy Xalq Respublikasining Shinjon-Uyg‘ur avtonom rayonida xizmat safari bilan bo‘lib turibdi.

Tashrifdan ko‘zlangan asosiy maqsad — ilg‘or xorijiy tajribalarni o‘rganish, zamonaviy qishloq xo‘jaligi texnologiyalarini jalb qilish, jumladan, paxta terish mashinalarini xarid qilish hamda samarali paxta yetishtirish usullarini amaliyotga joriy etishdir.

Delegatsiya a’zolari suv tejovchi zamonaviy tizimlar va tomchilatib sug‘orish texnologiyalarini o‘rganish, agroklasterlar, ilmiy-tadqiqot markazlari va zamonaviy texnika ishlab chiqaruvchi korxonalar faoliyati bilan tanishmoqda.

Tashrif natijasida Xitoy tajribasi asosida hosildorlikni oshirish va suv resurslaridan samarali foydalanishga qaratilgan qator loyihalarni tumanda amalga oshirish rejalashtirilgan.