Kattaqo‘rg‘on tumani Do‘stlik mahallasida yashovchi, hayot yo‘lini ilm va ma’rifatga bag‘ishlagan, 89 yoshli Chori Qo‘ng‘irov hamda uning turmush o‘rtog‘i Robiya Aminova alohida ehtiromga loyiq insonlar. Ular 60 yildan ortiq vaqt davomida qo‘sha qarib, ikki o‘g‘il va uch qizni voyaga yetkazib, oilaviy ziyolilik namunasini ko‘rsatib kelmoqdalar.

Chori bobo va Robiya ona uzoq yillar davomida maktabda geografiya fanidan yosh avlodga saboq berdilar. Shu bois ularni mahallada “geograflar oilasi” deb atashadi. Ilmga muhabbat bilan yashagan bu oila nafaqat o‘z farzandlariga, balki ko‘plab o‘quvchilarga hayotda to‘g‘ri yo‘l tanlash va bilimli bo‘lishning ahamiyatini o‘rgatdi.

Shuningdek, Chori Qo‘ng‘irov qalamiga mansub 14 ta kitob nashr etilgan bo‘lib, ularning har biri hayot mazmunini ochib beruvchi, ma’naviyatga chorlovchi asarlardir. Uning “Yillar so‘roni”, “Mustaqillik nashidasi”, “Hayot va haqiqat”, “Shirin hayotning qora dog‘lari” kabi kitoblari ko‘plab kitobxonlar orasida o‘z o‘quvchisini topgan.

Mustaqilligimizning 34 yillik bayrami arafasida tuman hokimi o‘rinbosari Obidjon Shirinov boshchiligidagi mas’ullar Chori Qo‘ng‘irov holidan xabar oldilar. Ushbu tashrif nafaqat ularning xizmatlariga ehtirom ifodasi, balki yurtda ilm-fan va ma’naviyat sohiblariga berilgan qimmatning yorqin namunasidir.