Muhtaram Prezidentimizning qarorlarini ijrosini ta’minlash maqsadida tumanimizdagi kriminogen vaziyat bo‘yicha har oy yakuni bilan “profilaktik-ogohlantiruvchi murojaat” yo‘llab borilmoqdamiz.

Sizlarga tumanimizda iyul oyida sodir etilgan jinoyatlar haqida qisqacha ma’lumot bermoqchiman.

Joriy yilning iyul oyida jami 67 ta jinoyat sodir etildi. Ularning 19,5 foizi tashabbus bilan aniqlangan, 37,3 foizi oldini olish mumkin bo‘lgan jinoyatlar, 43,2 foizi esa axborot texnologiyalari orqali sodir etilgan jinoyatlarni tashkil qiladi. Shu bilan birga, oldini olish mumkin bo‘lgan jinoyatlar soni o‘tgan yilning shu davriga nisbatan 3,4 foizga kamayishiga erishildi.

Olib borilgan chora-tadbirlar natijasida iyul oyida qotillik, bosqinchilik, nomusga tegish va avtomashinalarni olib qochish kabi og‘ir jinoyatlar sodir etilishiga yo‘l qo‘yilmadi.

Mahallalarda xavfsiz muhit yaratishga qaratilgan tadbirlar natijasida 69 ta mahallaning 34 tasida umuman jinoyat sodir etilmadi. Jinoyat qayd etilgan mahallalarda esa vaziyatni barqarorlashtirish bo‘yicha kompleks chora-tadbirlar amalga oshirilmoqda.

Bundan tashqari, tumanimizda 15 iyuldan 15 avgustga qadar “Xavfsiz va sog‘lom yurt” tezkor profilaktik tadbiri o‘tkazildi.

Uning davomida 30 ta tintuv tadbirlari o‘tkazilib, natijada 8 ta giyohvandlik moddalarini saqlash va sotish holati aniqlandi. Jinoiy javobgarlikdan qochib yurgan 14 nafar qidiruvdagi shaxs ushlandi, ochilmay turgan 3 ta jinoyat ochildi. Shuningdek, tungi reydlar davomida sovuq qurol bilan bog‘liq 95 ta huquqbuzarlik holati aniqlanib, o‘tkir tig‘li jismlar tegishli tartibda rasmiylashtirib olindi.

134 ta mayda bezorilik holati qayd etildi, 112 nafar shaxsga ma’muriy qamoq jazosi qo‘llanildi. Jamoat joylarida spirtli ichimlik iste’moli bilan bog‘liq 910 ta holat aniqlanib, ular bo‘yicha jarima jazosi qo‘llanildi.

Shuningdek, mahallalarda qarovsiz qolgan 26 nafar voyaga yetmagan bola ijtimoiy-huquqiy yordam markaziga, 8 nafar shaxs esa Reabilitatsiya markazlariga joylashtirildi. Farzandiga ta’lim va tarbiya berish majburiyatini bajarmaganligi uchun 181 nafar ota-onaga ma’muriy ta’sir choralari qo‘llanildi.

121 nafar xotin-qiz tazyiq va zo‘ravonlikdan jabr ko‘rganligi aniqlandi va ularga himoya orderlari berildi. Buning natijasida 87 ta oila yarashtirildi, 29 ta oiladagi nizolar bartaraf etildi. Shuningdek, 170 nafar profilaktik hisobda turgan ruhiy kasal, giyohvand va spirtli ichimlikka ruju qo‘ygan shaxs majburiy davolanishga yotqizildi.

Aziz fuqarolar!

Kiber jinoyatlarni oldini olish maqsadida agar sizga notanish raqamdan qo‘ng‘iroq qilib shaxsiy ma’lumotlaringiz so‘ralsa yoki bank kartangizga hujum haqida xabar bersa, hech qachon ishonmang! Bankning ishonch telefoniga murojaat qiling. Sizga yuborilayotgan fayllarni yuklab olmang va ochmang, kiber jinoyat qurboni bo‘lib qolmang.

Shuningdek: xonadon va ob’yektlarda o‘g‘rilikning oldini olish uchun ularni qo‘riqlash pultiga ulash tavsiya etiladi;

chorva mollarini qarovsiz qoldirmaslik lozim.

Hurmatli kattaqo‘rg‘onliklar!

Davlatimiz rahbari boshchiligida amalga oshirilayotgan barcha chora-tadbirlar xalqimizning tinch-totuv va xavfsiz hayot kechirishiga qaratilgan. Shu bois biz hamkor tashkilotlar va jamoatchilik bilan birgalikda jinoyatchilikni oldini olish, huquqbuzarliklarga qarshi kurashish va mahallalarda xavfsiz muhitni yaratish choralarini yanada jadallashtiramiz.

Bu ishlarimizda siz, aziz fuqarolarimizning faol ishtirokingiz muhim ahamiyat kasb etadi.

Murojaatim yakunida, barchangizni yana bir bor ogohlikka va hamjihatlikka chaqirib qolaman.