2025 yil 26 mart kuni soat 15:00 da Xalq deputatlari Kattaqo‘rg‘on tumani Kengashining VII chaqiriq sakkizinchi sessiyasi bo‘lib o‘tdi. Sessiya kun tartibida tumanning ijtimoiy-iqtisodiy rivojiga qaratilgan bir qator dolzarb masalalar ko‘rib chiqildi.

Sessiya kun tartibidagi asosiy masalalar quyidagilardan iborat bo‘ldi:

1. O‘zbekiston Respublikasi Oliy Majlisi Senati Kengashining 2025 yil 14 yanvardagi KQ-35-V-sonli qarori ijrosini ta’minlash – mahalliy Kengash deputatlari va senatorlar faoliyatini “mahalla yettiligi” bilan uzviy hamkorlikda tashkil etish masalalari muhokama qilindi.

2. Yoshlar maslahat guruhini tuzish – tuman Kengashi huzurida yoshlarning fikri va tashabbuslarini inobatga olish maqsadida maslahat guruhi tashkil etish to‘g‘risida qaror qabul qilindi.

3. Ekspert guruhi tarkibiga o‘zgartirish kiritish – 2025 yil 19 fevraldagi qarorning 2-ilovasi qayta ko‘rib chiqilib, tarkibiy o‘zgarishlar kiritildi.

4. “Zarbdor tajribasi” asosidagi drayver loyihalarni muvofiqlashtirish – 2025 yil 5 martdagi qaror ilovasiga tegishli o‘zgartirishlar kiritildi.

5. Mahalliy byudjet erkin qoldig‘i – tumanning mahalliy byudjeti hisobidan qolgan mablag‘larni maqsadli va samarali ishlatish masalalari ko‘rib chiqildi.

6. Xizmatlar sohasi rivojiga oid qaror ijrosi – Samarqand viloyati hokimining 2025 yil 22 martdagi 72-7-0-Q/25-sonli qarori ijrosi yuzasidan ma’lumot berildi.

7. “O‘zbekiston – 2030” strategiyasi ijrosi – tuman hokimining o‘rinbosari, Oila va xotin-qizlar bo‘limi boshlig‘i S.Djumayeva hisobot berdi.

8. Qishloq joylarni rivojlantirish bo‘yicha davlat dasturlari – Prezidentning 2024 yil 28 martdagi PQ-141-sonli qarori ijrosi doirasida amalga oshirilayotgan ishlar to‘g‘risida axborot berildi.

9. Sog‘liqni saqlash sohasida amalga oshirilayotgan ishlar – “Adolat” partiyasi deputatlik guruhi tashabbusi bilan sog‘liqni saqlash tizimi, dori vositalari aylanmasi, onalar va bolalar sog‘lig‘iga oid masalalar yuzasidan tuman tibbiyot birlashmasi rahbari V.Xudoyqulov hisoboti tinglandi.

10. Elektr ta’minotini yaxshilash – 2025 yilda aholini barqaror elektr energiyasi bilan ta’minlash bo‘yicha tuman elektr tarmoqlari korxonasi rahbari J.Alimov hisobot berdi.

11. Boshqa masalalar – turli dolzarb tashabbus va qarorlar muhokama qilindi.

Sessiya yakunida qarorlar qabul qilindi va ularning ijrosini ta’minlash yuzasidan mutasaddilarga aniq vazifalar yuklatildi.