Bugun Xalq deputatlari Kattaqo‘rg‘on tumani Kengashining VII chaqiriq to‘rtinchi sessiyasi bo‘lib o‘tdi. Sessiyani tuman hokimi, Kengash raisi Jamshid Nasriddinov olib bordi. Unda tumanning ijtimoiy-iqtisodiy rivojlanishiga oid qator muhim masalalar ko‘rib chiqildi va tegishli qarorlar qabul qilindi.

Sessiya kun tartibidagi asosiy masalalar:

1. Kattaqo‘rg‘on tumanining 2025 yilgi mahalliy byudjetini tasdiqlash
2025 yilgi mahalliy byudjet muhokama qilinib, tasdiqlandi. Bu byudjet tumanda ijtimoiy loyihalarni amalga oshirish va aholining farovonligini oshirishga qaratilgan.

2. Yer va unga bog‘liq resurslarning hisobini yuritish bo‘yicha chora-tadbirlar
Sessiyada tuman hududidagi davlat zaxira yerlari, qishloq xo‘jaligida foydalanilmaydigan va foydalaniladigan yerlarning aniq hisobini yuritish va ularni samarali boshqarish masalalari muhokama qilindi. Shuningdek, ayrim yerlarni ijara huquqiga o‘tkazish bo‘yicha qarorlar qabul qilindi.

3. “Kambag‘allikdan farovonlik sari” dasturini amalga oshirish
2025 yilda tanlangan mahallalarda tomorqa yerlarini sug‘orishni yaxshilash uchun amalga oshiriladigan chora-tadbirlar dasturi tasdiqlandi. Bu tashabbus aholining daromadlarini oshirish va tomorqalardan samarali foydalanishni ta’minlashga qaratilgan.

4. Fermer xo‘jaliklari faoliyati monitoringi
Ayrim fermer xo‘jaliklari tomonidan yer uchastkalaridan oqilona va ehtiyotkorona foydalanish bo‘yicha monitoring natijalari ko‘rib chiqildi. Yerdan samarali foydalanishni ta’minlash bo‘yicha takliflar va tavsiyalar qabul qilindi.

Sessiya yakunida muhokama qilingan barcha masalalar bo‘yicha tegishli qarorlar qabul qilinib, ijrosi yuzasidan mas’ullarga aniq vazifalar belgilab berildi. Sessiya jamiyat farovonligi va iqtisodiy rivojlanish uchun muhim qadamlardan biri bo‘ldi.

Sessiya so‘ngida Kattaqo‘rg‘on tumani “Charog‘on” mahallasi yoshlar yetakchisi, tuman Kengashining eng yosh  deputati Baxtiyorov Sodiq Sobir o‘g‘liga “O‘zbekiston belgisi” ko‘krak nishoni topshirildi.