Kattaqo‘rg‘on tumanida xususiy ta’lim sektori jadal rivojlanib, aholiga zamonaviy va sifatli ta’lim xizmatlarini taqdim etmoqda. Hozirda tumanda ikki xususiy maktab — "CREATIVE KIDS CENTER" va "IT-SCHOOL KIDS" faoliyat yuritmoqda. Ushbu maktablarda 402 nafar o‘quvchi ta’lim olmoqda. Ayniqsa, "IT-SCHOOL KIDS" maktabida darslar rus tilida o‘tishi yoshlarning xalqaro maydonda raqobatbardosh kadr bo‘lib yetishishiga xizmat qilmoqda.

Maktabgacha ta’limda ham xususiy sektor sezilarli ulushga ega. Jami 153 ta maktabgacha ta’lim tashkiloti mavjud bo‘lib, ularning quvvati 6192 o‘rinni tashkil etadi. Bu tashkilotlarda 5407 nafar bola ta’lim olmoqda, shundan 20,6 foizi xususiy sektor hissasiga to‘g‘ri keladi. Ushbu natijalar tumanda xususiy sektorning ta’limdagi ahamiyati ortib borayotganidan dalolat beradi.

2025-yilgacha tumanda 32 ta yangi oilaviy maktabgacha ta’lim tashkiloti ochilishi rejalashtirilgan. Bundan tashqari, davlat-xususiy sheriklik asosida 3 ta yangi tashkilot ishga tushirilishi kutilmoqda. Bu rejalar amalga oshirilsa, maktabgacha ta’lim qamrovi 26,2 foizgacha oshishi ta’minlanadi.

Xususiy ta’lim sektoridagi bunday rivojlanishlar Kattaqo‘rg‘on tumani aholisiga zamonaviy bilim va imkoniyatlarni taqdim etishda muhim qadam bo‘lib xizmat qiladi. Har bir tashabbus farzandlarimiz kelajagi uchun mustahkam poydevor yaratmoqda.

Kattaqo‘rg‘on – ilm va ma’rifat markazi sifatida rivojlanib bormoqda!