Bugun Kattaqo‘rg‘on tumani hokimi Jamshid Nasriddinovning 45 km masofada joylashgan Omonkalxat mahallasida o‘tkazilgan sayyor qabuli yana bir bor fuqarolarning ehtiyojlari va muammolarini hal qilishga qaratilgan amaliy qadam bo‘ldi. Ushbu tadbirda 3-sektor rahbari Aslam Ochilov, korxona va tashkilotlar rahbarlari, shuningdek, mahallaning faol aholisi ishtirok etdi.

Tadbir avvalida hokim Jamshid Nasriddinov mahallada amalga oshirilgan ishlar va kelgusidagi loyihalar to‘g‘risida so‘z yuritdi. Hokim mahallaning rivoji uchun barcha imkoniyatlar safarbar etilayotganini ta’kidlab, istiqboldagi rejalar haqida fikr bildirdi.

Qabul jarayonida aholi o‘z muammolari va takliflarini bemalol bildirish imkoniga ega bo‘ldi. Asosan, tibbiy xizmatlarni yaxshilash, elektr energiyasi ta’minoti, ichki yo‘llarni ta’mirlash, tadbirkorlikka yordam berish va kredit ajratish kabi dolzarb masalalar ko‘rib chiqildi.

Tadbir yakunida ichimlik suvi masalasi hal etilganligi haqidagi xabar mahalla aholisining yuziga quvonch olib keldi. Fuqarolar davlatimiz rahbariga o‘z minnatdorchiliklarini bildirdi.

Omonkalxatdagi mazkur sayyor qabul nafaqat muammolarni hal etish, balki aholi bilan yaqin muloqot o‘rnatish va ularning ishonchini yanada mustahkamlashning yana bir amaliy namunasi bo‘ldi.