ЭЛГА МАДАД БЎЛИШ БАХТИ

Депутатлик фаолиятим  давомида турли  касб эгалари билан ҳамсуҳбат, ҳамфикр бўлиш асносида уларнинг ҳозирги синовли  кунларда фидойилик  билан  олиб  бораётган фаолиятини кузата туриб кўнглимдан  кечганларини ўртоқлашгим келди...

         Тўғрироғи, юртимизда карантин давом этаётган бир пайтда ҳам томорқасини  "гуллатиб",  хонадонида  ипак  қурти боқиб,  оила  бюджетига яхшигина  даромад қўшаётган, фарзандларини меҳнатсеварлик, меҳнатдан қадр топишга ўргатиш баробарида йиллаб кутган яхши кунларини ўша даромад орқали амалга ошириб келаётган яхши одамларга катта  имкониятлар эшигини очиб бераётган тадбиркор аёл Марям опа ҳақида нимадир яхши гап айтгим келди.

Шу мақсадда опани йўқлаб у киши раҳбарлик қилиб келаётган "Кумуш тола" корхонасига бордим. "Карантин шароитида яшаш ва ишлашни  ўрганамиз" шиорига амал қилиб фаолият  юритаётган "Кумуш тола"чилар ишни метин интизом асосида олиб боришаётган экан. Мени қатъий санитария қоидаларига амал қилган ҳолда ичкарига киришимга рухсат  беришди.

Кўринишидан ниҳоятда ҳокисор, ҳалимлиги чеҳрасидан кўриниб  турган Марям опа билан саломлашиб, ҳол аҳвол  сўрашдик. Суҳбат давомида вилоятимизда еттита пиллачилик билан шуғулланувчи тадбиркорлик субъектлари раҳбарлари ичида Марям опа ягона хотин-қиз тадбиркор эканлигини, қолаверса, туман миқиёсида чет эл инвестициясини жалб қилишга эришган кам сонли тадбиркорлардан бири бўлган опанинг фаолиятига ҳавасмандлар  кўплигини билганим  учун  ҳам  жуда қувондим.

Марям  опа  билан  биргалашиб  Абдулазиз  акани  хоналарига  бордик.

- Ипак қурти бўйича қанақа саволларингиз бўлса, бемалол жавобни шу кишидан оласиз, - дея опа мени Абдулазиз ака билан таништирди. – Бу йил 304 тонна  "кумуш тола" етиштириш  кўзда  тутилган, - дейди Абдулазиз ака. –Туманимиздаги ишсиз юрган хотин-қизларни иш билан таъминлашга кўмаклашиш мақсадида айни кунларда салкам 2600 та хонадонда 5527 қути ипак қурти парваришланмоқда. Бу  дегани икки ярим мингдан ортиқ хонадонда беш  ярим минг хотин-қиз мавсумий иш билан таъминланиб, бир йиллик меҳнат стажига эга бўлмоқда, деганидир. Қолаверса, корхонанинг ўзида ҳам фаолият олиб бораётган 97 нафар  ходимларнинг 70 фоизи опа-сингилларимизни ташкил қилади. Фаолиятимиз давомида Хитой, Эрон, Бирлашган Араб Амирликлари, Покистон каби давлатларнинг тадбиркорлари билан ҳамкорликда фаолият юритдик. Корхонамиз жамоаси вилоятда ҳамиша олдинги  сафларда бормоқда.

Баъзида ёнгинамизда одамларга барча имконият эшикларини очиб  бериб, ўзи ҳам ҳузурланадиган Марям опа каби бағрикенг, қўли очиқ саховатпеша инсонларнинг ҳар бир ҳаракатида ҳикмат яширинлигини  кўпчилигимиз ҳам англайвермаймиз. Тадбиркорлиги сабаб элига мадад  бўлиш ҳам ҳаммага насиб қилавермайди. Бу борада Марям опа Ниёзованинг  омади келган. Моҳи Рамазон кунлари кўплаб эҳтиёжмандлар корига яраган Марям опани кўпчилик дуо қилаётган бўлса не ажаб.

Шунинг учун ҳам "митти маликалар" парваришига бор меҳрини беришга интилаётган онахонларимиз, азиз опа-сингилларимизнинг  кайфиятларини кўриб, тадбиркор Марям опа томонидан қўллаб-қувватланганлигидан мамнунлиги кўриб, бир мунча осондай туюлган бу  юмушнинг ортида машаққатли меҳнатнинг роҳатини кутиб яшаш қанчалар сурурли, ҳузурбахш эканлигини ҳис қилиб дил яйрайди.

Болалигимда  деярли ҳар йили оиламизда ипак қурти боқиш билан шуғулланганимиз учун  ҳам бу жараённинг азоб-у ҳузури менга яхши таниш. Шу сабабли "кумуш  тола" ижодкорларига: “Хирмонингизга барака, азиз  пиллакорлар, Каттақўрғон тажрибаси жаҳон айвонига ёйилсин”, - дегим келди...

Азиза БОЙМУРАДОВА,

туман  Кенгаши депутати.