Туман ҳудудидаги жисмоний ва юридик шахсларга тегишли автомототранспорт воситалари ва улардаги тиркамаларни мажбурий техник кўрикдан ўтказиш тўғрисида

Ўзбекистон Республикасининг “Йўл ҳаракати хавфсизлиги тўғрисида”ги Қонуни ҳамда Ўзбекистон Республикаси Вазирлар Маҳкамасининг 2003 йил 31 январдаги 54-сонли “Транспорт воситаларини мажбурий техник кўрикдан ўтказиш тартиби тўғрисидаги низомни тасдиқлаш ҳақида”ги ва 2017 йил 22 декабрдаги 1010-сонли “Транспорт воситаларини мажбурий техник кўрикдан ўтказиш тартибини такомиллаштиришга доир қўшимча чора-тадбирлар тўғрисида”ги Қарорлари ижросини таъминлаш мақсадида

Қ A Р О Р Қ И Л A М A Н :

1.Туман ҳудудидаги жисмоний ва юридик шахсларга тегишли автомототранспорт воситалари 2021 йилда тадбиркорлик субъектлари - юридик шахслар томонидан мажбурий техник кўрикдан ўтказиш ишларини ташкиллаштириш туман ИИБ ЙҲХБ (М.Қўчқоров)га юклатилсин.

2.Белгилаб қўйилсинки, амалдаги қонунчиликка асосан техник кўрикдан ўтказилади:

а) тижорат асосида йўловчилар ташиш учун фойдаланиладиган енгил автомобиллар, автобуслар ва ўтириладиган жойлар сони 8 та ва ундан ортиқ бўлган (ҳайдовчининг ўрнидан ташқари), одамларни мунтазам ташиш учун жиҳозланган юк автомобиллари, йирик габаритли, оғир вазнли ва хавфли юкларни ташиш учун махсус транспорт воситалари ва улардаги тиркамалар-бир йилда икки марта;

б) ишлаб чиқарилганлигига беш йилдан кўп бўлмаган (ишлаб чиқарилган йили ҳам шу жумлага киради) транспорт воситалари (мазкур банднинг “а” кичик бандида кўрсатилган транспорт воситалардан ташқари) - икки йилда бир марта;

д) ишлаб чиқарилган йилини ҳисобга олган ҳолда ишлаб чиқарилганлигига беш йилдан ортиқ бўлган транспорт воситалари, шунингдек ишлаб чиқарилган вақти аниқланмаган транспорт воситалари (мазкур банднинг “а” кичик бандида кўрсатилган транспорт воситаларидан ташқари) - бир йилда бир марта;

е) тиркамалар кўрикка транспорт воситаси - шатакчи учун белгиланган муддатларда;

ф) навбатдаги техник кўрикдан ўтказишнинг илгари ўрнатилган муддатларидан қатъи назар, уларни ЙҲХ органларида рўйхатдан ўтказиш (қайта рўйхатдан ўтказиш) вақтида;

г) улар ишлаб чиқарилган йилдан қатъи назар, ЙҲХ органларида рўйхатдан ўтказилган (қайта рўйхатдан ўтказилган) кундан бошлаб бир йил ўтгач (мазкур банднинг «а» кичик бандида кўрсатилган ҳолатлар бундан мустасно).

4.Мазкур қарорнинг 2-банди “а” кичик бандида кўрсатилган транспорт воситаларининг техник кўриги:

биринчи марта - 1 март - 30 июнда;

иккинчи марта - 1 сентабр -31 октабрда ўтказилади.

Юридик шахсларга тегишли бўлган транспорт воситаларининг техник кўриги 1-мартдан -30 июнгача ўтказилсин.

Жисмоний шахсларга қарашли бўлган транспорт воситаларининг техник кўриги 1 февралдан 31 августгача ўтказилиши инобатга олинсин.

5. Тумандаги юридик ва жисмоний шахсларга тегишли бўлган автобус, ўриндиқлар сони 8 та ва ундан ортиқ бўлган (ҳайдовчининг ўрнидан ташқари), одамларни мунтазам ташиш учун жихозланган юк автомобиллари, йирик габаритли, оғир вазнли ва хавфли юкларни ташиш учун махсус транспорт воситалари ҳамда уларнинг тиркамаларини тадбиркорлик субъектлари - юридик шахсларга қарашли техник кўрикдан ўтказиш шахобчасида техник кўрикдан ўтказилиши тавсия этилсин.

6. Транспорт воситалари тадбиркорлик субъектлари - юридик шахслар томонидан техник кўрикдан ўтказилганлиги учун Ўзбекистон Республикаси Ички ишлар вазирлиги томонидан Молия вазирлиги билан келишилган ҳолда тасдиқланадиган миқдорда йиғимлар ундирилади.

Биринчи (олдинги) техник кўрик носоз деб топилган транспорт воситалари такрорий техник кўрикдан ўтказилганлиги учун белгиланган миқдорларда йиғим ундирилади.

Техник кўрикдан ўтказилганлиги учун йиғим суммаси маҳаллий буджетга ўтказилади.

7. Техник кўрикни ўтказиш жадвали 1-иловага; техник кўрикдан ўтказиш бўйича комиссиянинг таркиби 2-иловага мувофиқ тасдиқлансин.

8. Техник кўрикни ўтказиш бўйича комиссия раиси (М.Қўчқоров)га:

юридик шахсга техник кўрик ўтказиладиган муддатлар тўғрисидаги билдиришнома юбориш;

техник кўрикни ташкилотларда, диагностика станцияларида ва техника хизмати кўрсатиш станцияларида иш вақтида, техник назорат постларида иш кунларининг кундузги ва тунги вақтларида ёки ҳафтанинг дам олиш кунларидан бирида ўтказиш;

юридик ва жисмоний шахсларга тегишли бўлган транспорт воситалари техник кўригидан ўтказилганлиги бўйича тўлиқ маълумотларни (техник кўрикдан маҳаллий буджетга тушадиган йиғимларни) ҳар ойнинг якуни билан туман ҳокимлигига ёзма равишда батафсил ахборот бериб бориш;

техник кўрикдан ўтказишда техник жиҳатдан носоз деб топилган транспорт воситаларининг, шунингдек, техник ҳолати белгиланган талабларга жавоб бермайдиган ёки тегишли рухсатномасиз қайта жиҳозланган транспорт воситаларининг камчиликлари ва носозликларни бартараф этиш бўйича белгиланган тартибда тегишли чораларни кўриш вазифалари юклатилсин.

9. Мазкур қарор “Каттақўрғон ҳақиқати” газетасида эълон қилинсин ҳамда ҳокимликнинг расмий веб-сайтига жойлаштирилсин.

10. Мазкур қарор расмий эълон қилинган кундан эътиборан кучга киради.

11. Ушбу қарор қабул қилиниши муносабати билан туман ҳокимининг 2020 йил 16 февралдаги 35-Қ сонли қарори ўз кучини йўқотган деб ҳисоблансин.

12. Қарорнинг бажарилишини назорат қилиш туман ҳокимининг ўринбосари Н.Санақулов зиммасига юклатилсин.

Туман ҳокими в.б. Ж.Насриддинов.

№. 29 - Қ .

2021 йил 10 феврал